2025 – viti më i suksesshëm ndonjëherë për kasollet alpine në Zvicër

Sipas të dhënave zyrtare, gjatë vitit janë regjistruar rreth 409 mijë qëndrime gjatë natës, që përfaqëson një rritje prej 12.7% krahasuar me vitin paraprak

Viti 2025 është regjistruar si më i suksesshmi në historinë e Swiss Alpine Club, me një numër rekord të qëndrimeve në kasollet alpine në të gjithë vendin.

Sipas të dhënave zyrtare, gjatë vitit janë regjistruar rreth 409 mijë qëndrime gjatë natës, që përfaqëson një rritje prej 12.7% krahasuar me vitin paraprak.

Pjesa më e madhe e këtyre qëndrimeve ka qenë gjatë verës (319 mijë), ndërsa dimri ka kontribuar me rreth 90 mijë qëndrime. Veçanërisht sezoni dimëror ka shënuar rritje të fortë prej mbi 25%, duke qenë faktor kyç në këtë rekord historik, transmeton albinfo.ch.

Rajonet më të frekuentuara kanë qenë Alpet e Valais, të ndjekura nga ato të Graubünden dhe Bernës. Ndërkohë, kasollja më e vizituar ka qenë Lämmerenhütte në Valais, me mbi 10 mijë qëndrime gjatë vitit.

Megjithatë, pavarësisht këtij suksesi, ekspertët paralajmërojnë për sfida serioze në të ardhmen. Ndryshimet klimatike, shkrirja e përmafrostit dhe kushtet ekstreme të motit po rrisin kostot dhe po kërkojnë investime të mëdha për mirëmbajtjen dhe ndërtimin e infrastrukturës alpine.

Sipas parashikimeve, deri në vitin 2040 mund të nevojiten deri në 20–25 milionë franga në vit për projekte të lidhura me kasollet alpine, një pjesë e konsiderueshme e të cilave lidhet drejtpërdrejt me ndikimet e klimës.

---