Gjykata Speciale cakton 16 shtatorin për shpalljen e aktgjykimit ndaj Thaçit dhe të tjerëve

Gjykata Speciale ka vendosur që më 16 shtator 2026, në orën 10:00, të shpallë aktgjykimin ndaj ish-presidentit Hashim Thaçi, si dhe ndaj Kadri Veselit, Rexhep Selimit dhe Jakup Krasniqit.

Sipas njoftimit zyrtar, Trupi Gjykues në këtë çështje për krime lufte dhe krime kundër njerëzimit ka theksuar se shtyrja e afatit është konsideruar e domosdoshme për shkak të kompleksitetit të rastit dhe vëllimit të madh të provave.

Gjatë procesit janë dëgjuar rreth 270 dëshmitarë, ndërsa janë pranuar 5.467 prova materiale. Po ashtu, transkripti i seancave gjyqësore arrin në 29.238 faqe dokumentacion.

Gjykata ka theksuar se koha shtesë ishte e nevojshme për të garantuar një vlerësim të plotë, të drejtë dhe të arsyetuar të të gjitha provave të paraqitura gjatë procesit gjyqësor.