AI po ndryshon tregun e punës në Zvicër, përvoja me inteligjencën artificiale po bëhet kusht për punësim

(KEYSTONE/Martial Trezzini)

Inteligjenca artificiale (AI) po ndryshon me ritme të shpejta tregun e punës në Zvicër, ndërsa njohuritë dhe përvoja praktike me këtë teknologji po shndërrohen në një kriter gjithnjë e më të rëndësishëm për punësim.

Sipas një studimi të Shoqatës së Punonjësve të Zvicrës, mbi 80 miliardë franga zvicerane paga lidhen tashmë me punonjës që dinë të përdorin AI për të rritur efikasitetin e kompanive. Ndërkohë, të dhënat e PwC tregojnë se gjatë vitit të kaluar numri i vendeve të punës që kërkojnë aftësi në inteligjencën artificiale u rrit në rreth 25 mijë, një rekord i ri.

Kompani të njohura si Roche, On, The North Face dhe banka Sygnum kërkojnë kandidatë me përvojë në përdorimin e mjeteve të AI për automatizimin e proceseve, krijimin e përmbajtjes dhe zhvillimin e strategjive të biznesit.

Megjithëse shqetësimet për zëvendësimin e punonjësve nga inteligjenca artificiale vazhdojnë, ekspertët theksojnë se ndikimi afatgjatë do të varet nga investimet në arsim, trajnime dhe rregullimin e teknologjisë. Ata vlerësojnë se AI nuk do të zëvendësojë plotësisht njerëzit, por do të rrisë rëndësinë e aftësive si mendimi kritik, komunikimi, gjykimi profesional dhe mbikëqyrja e sistemeve të inteligjencës artificiale.

Sipas raportit të PwC, kompanitë që e përdorin AI për të krijuar produkte dhe shërbime të reja, e jo vetëm për të automatizuar detyrat, kanë potencial të krijojnë më shumë vende pune dhe të ofrojnë paga më të larta.