17 vjeçari shqiptar, bos i një bande të drogës

17 vjeçari, i kapur në dhjetor të vitit të kaluar, ka vepruar në disa kantone të Zvicrës dhe ka bërë tregti me 25 kilogramë heroinë

Foto Ilustrim

Një shqiptar 17 vjeçar, me qëndrim në Zvicër, është identifikuar nga policia si kreu i një bande trafikatësh të lëndëve narkotike. I mituri, i kapur në dhjetor të vitit të kaluar, ka vepruar në disa kantone të Zvicrës dhe, së bashku me bandën, ka bërë tregti me 25 kilogramë heroinë, njofton blick.ch.

Duke iu referuar burimeve policore, vlerësohet se nga shitja e kësaj droge në rrugë do të fitoheshin 1 milion e 500 mijë fraga.

Aktualisht policia e Gjenevës po heton kundër katër të përfshirëve të tjerë, në mesin e të cilëve është edhe vëllai më i vjetër i “bosit”.

I mituri, sipas policisë, e drejtonte organizatën e tij me një autoritet të madh. Ai madje, duke mos pasur vetë leje drejtimi të automjetit, për shofer të vetin e shfrytëzonte vëllanë më të madh.

17 vjeçari do të përgjigjet para një gjykate për të rinj në Cyrih, ku dënimi maksimal që mund të marrë është 4 vjet burg. Ndërsa të paditurit tjerë, që do të gjykohen në Gjenevë, pritet të marrin dënime deri në 20 vjet burg, shkruan blick.ch