15 vjet nga liberalizimi i vizave: momenti që ndryshoi lëvizjen e shqiptarëve drejt Evropës

Pesëmbëdhjetë vjet më parë, udhëtimi i qytetarëve shqiptarë drejt Evropës hyri në një fazë të re. Më 15 dhjetor 2010, vendet e Bashkimit Evropian hoqën regjimin e vizave për shtetasit e Shqipërisë, duke u mundësuar atyre lëvizjen pa viza në hapësirën Shengen për qëndrime afatshkurtra.

Vendimi ishte formalizuar disa javë më herët, më 8 nëntor 2010, kur ministrat e Brendshëm dhe të Drejtësisë të BE-së miratuan liberalizimin e vizave për Shqipërinë dhe Bosnje-Hercegovinën. Me hyrjen në fuqi të këtij vendimi, qytetarët shqiptarë fituan të drejtën të udhëtojnë lirshëm në 27 shtete evropiane, pa pasur nevojë për procedura konsullore.

Megjithatë, lëvizja pa viza nuk nënkupton qëndrim të pakufizuar. Sipas rregullave të zonës Shengen, shtetasit shqiptarë mund të qëndrojnë deri në 90 ditë brenda një periudhe 180-ditore, pa të drejtë pune apo qëndrimi afatgjatë.

Shqipëria u rendit kështu mes vendeve të Ballkanit Perëndimor që përfituan nga ky regjim, pas Maqedonisë së Veriut, Malit të Zi dhe Serbisë, të cilat kishin marrë të njëjtin vendim në fund të vitit 2009. Kosova, nga ana tjetër, mbeti për vite me radhë jashtë këtij procesi, duke u bërë vendi i fundit në rajon që fitoi të drejtën e udhëtimit pa viza drejt BE-së.

Liberalizimi i vizave u konsiderua një nga hapat më të rëndësishëm në afrimin e Shqipërisë me Bashkimin Evropian, duke ndikuar drejtpërdrejt në shkëmbimet kulturore, familjare dhe ekonomike të qytetarëve shqiptarë me vendet evropiane.