Zvicrës do t`i duhen 15 vjet për uljen e borxheve të shkaktuara nga virusi

"Me një hyrje të re në borxh prej rreth 30 miliardë frangash, kjo do të ishte 2 miliardë franga në vit", ka thënë ministri

Këshilli Federal (Qeveria e Zvicrës) nuk ka vendosur akoma se si të plotësojë vrimën prej rreth 35 miliardë frangash që ka shkaktuar kriza e koronavirusit në buxhetin federal. Ministri i Financave Ueli Maurer pret që për të realizuar këtë, nevojiten rreth 15 vite.

“Ende ka shumë faktorë pasigurie, ne duhet t’i njohim më saktë faktet”, ka thënë Maurer në një intervistë në internet për “Finanz und Wirtschaft” të martën, transmeton albinfo.ch.

“Në planin afatmesëm, hapësira kohore mund të jetë rreth pesëmbëdhjetë vjet në kushte normale. Me një hyrje të re në borxh prej rreth 30 miliardë frangash, kjo do të ishte 2 miliardë franga në vit”, ka thënë ministri.

Maurer është kundër përdorimit të Bankës Kombëtare në këtë kontekst.

“Nuk ka asnjë arsye për të përdorur fonde shtesë nga Banka Kombëtare. Ajo ka një punë tjetër që aktualisht është e nënvlerësuar. Banka Kombëtare duhet të mbështesë kursin e këmbimit të frangut. Nëse nuk do të bënte asgjë në këtë fushë, do të kishim barazi me euron, që do të ishte një fatkeqësi për industrinë e eksportit”, ka thënë ai, transmeton albinfo.ch. Banka Kombëtare nuk duhet të paguajë borxhet e shtetit.

Përkundër të gjithave, ministri i financave është shprehur: “Nuk ka nevojë për panik, punësimi dhe ekonomia do të rikuperohen”.

---