Zvicra, propozime Kroacisë për lëvizjen e lirë

Sekretari shtetëror Rossier i ka ofruar Kroacisë disa propozime lidhur me rrjedhën e lëvizjes së lirë pas rezultatit të iniciativës kundër migrimit masive

Ndër problemet më imediate që kanë lindur pas votimit nga zviceranët të iniciativës «Kundër Migrimit Masiv» është ai i zgjerimit të marrëveshje për lëvizje të lirë edhe me Kroacinë, si anëtari më i ri i BE-së. Rezultati i iniciativës së përmendur e bën të pamundur këtë zgjerim.

Për të kërkuar një zgjidhje të këtij problemi të ri, sekretari shtetëror në Ministrinë e Punëve të Jashtme të Zvicrës, Yves Rossier ka qëndruar sot për një vizitë zyrtare në Kroaci. Me këtë rast ai është pritur nga ministrja e punëve të jashtme e Kroacisë, Vesna Pusic.

Sipas njoftimeve që vijnë nga Ambasada e Kroacisë në Bernë, Rossier i ka ofruar Kroacisë disa propozime lidhur me rrjedhën e mëtutjeshme të kësaj çështjeje. Pala kroate nga ana e saj e ka vlerësuar këtë veprim si shprehje e vullnetit të mirë nga ana e shtetit zviceran. Mirëpo, as Zvicra dhe as Kroacia nuk kanë bërë të ditur përmbajtjen e propozimeve në fjalë.

Pas iniciativës kundër migrimit masiv, Këshilli Federal i Zvicrës kishte vendosur që njëherë për njëherë të mos hynte në bisedime me Kroacinë  për zgjerimin e marëveshjes së lëvizjes së lirë.