Zvicra nuk ul çmimet e roamingut

Nëse në BE në vitin 2016 do të hiqen të gjitha këto taksa, Zvicra nuk e ka ndërmend të bëjë ndonjë hap në atë drejtim.

Përpjekjet që po bëhen në shtetet anëtare të BE-së për të hequr taksat e roamingut për telefonatat jashtë vendit, duket se nuk po i bëjnë përshtypje Zvicrës. Kështu, nëse në BE në vitin 2016 do të hiqen të gjitha këto taksa, Zvicra nuk e ka ndërmend të bëjë ndonjë hap në atë drejtim.

Ndonëse Swisscom ka premtuar përmes transmetuesit publik radio SRF zbritje të çmimeve, një heqje e taksave të roamingut nuk shihet njëherë në horizont.

Arsye për këtë është se operatorët e këtushëm: Swisscom, Sunrise dhe Orange do të duhej që në një rast të tillë të negocionin kontrata përkatëse me secilin vend evropian veç e veç. Pastaj këta operatorë nuk shohin ndonjë motiv për të ulur pjesën e tyre të taksave.

Çmimet më të ulëta për klientët zviceranë do të ishin të mundshme vetëm nëse të tre operatorët zviceranë do të ulnin pjesën e tyre të taksave, shkruan srf.ch.