Zvicra, në mesin e dhjetë vendeve me më së shumti rezerva të arit

Këshilli Botëror për Ari ka publikuar të dhënat e reja të vendeve me rezervat më të mëdha të arit, ku në vendin e parë figurojnë Shtetet e Bashkuara të Amerikës, me 8,133.5 tonelata.

Lista përfshin 100 vendet më të pasura, e në vendin e dytë është Gjermania me 3,377.9 tonë dhe e treta Fondi Monetar Ndërkombëtar (FMN) me 2,814.0 tonë, përcjell albinfo.ch.

Në mesin e dhjetë më të pasurve me ari janë: Italia, Franca, Kina, Rusia, Zvicra, Japonia dhe Holanda.

Kur është fjala për Ballkanin, Serbia mban vendin e “artë” (18.8 tonë) dhe ndodhet në vendin e 63-të. Pas saj vjen Maqedonia në vendin e 77-të, me 6.9 tonë ari. E 88-ta është Sllovenia me 3.2 tonë, ndërsa Bosnjë e Hercegovina me 3 tonë ari është e vendosur në vendin e 91-të.

Në vendin e 98-të është Shqipëria me 1.6 tonë, ndërsa në vendin e fundit, të 100-të, është Mongolia, me 1.5 tonë ari.