Zvicra gjatë vitit 2014 ka dëbuar afër 8600 azilkërkues

2444 janë kthyer në mënyrë të pavarur ndërsa në 6146 raste policia i ka përjellë deri në aeroplan personat me vendim lëshimi të Zvicrës

Gjatë vitit 2014 Zvicra ka bërë kthimin përmes rrugës ajrore të 8.590 azilkërkuesve të cilëve u është hedhur poshtë kërkesa për azil. E gjithë kjo ka pasur një kosto prej 8.5 milionë frangash.

Një vit më parë ishin 12.000 të huaj që ishin kthyer po ashtu me aeroplanë.

Dëbimi i azilkërkuesve përmes rrugës ajrore, sipas qeverisë, gjen shprehje vetëm për personat që në mënyrë të përsëritur i kanë rezistuar kthimit. Këta persona, për këtë arsye mbahen në burgun administrativ për të siguruar dëbimin e tyre.

Gjatë vitit 2014 kanë qenë 252 azilkërkues që janë dëbuar ose riatdhesuar përmes fluturimeve speciale. E gjithë kjo ka kushtuar 2.8 milionë franga, është shprehur për mediet zvicerane një zëdhënëse e Sekretariatit Shtetëror për Migracion (SEM).

Nga ana tjetër, prej 8590 personave që e kanë lëshuar Zvicrën, 2444 e kanë bërë këtë në mënyrë të pavarur ndërsa në 6146 raste policia i ka përjellë deri në aeroplan personat me vendim lëshimi të Zvicrës.

8.5 milionë frangat e përmendura nuk mbulojnë gjithë koston. Shpenzimet e përcjelljes policore llogariten në mënrë të veçantë, por SEM nuk ka statistikë lidhur me këtë.

Veç kësaj, autoritetet federale gjatë vitit të kaluar janë detyruar që të anulojnë afër 3000 fluturime me të cilat duhej të udhëtonin të huajt që kishin vendim për të lëshuar Zvicrën. Këto anulime kanë kushtuar 390.000 franga. Në Zvicrën frankofone ka pasur ë shumë anulime të tilla, pasi që atje ka qenë më e madhe munges e vendeve në burgje ku mbahen azilkërkuesit para dëbimit.