Zvicra mbështet fuqizimin e grave dhe barazinë gjinore në Kosovë

Zvicra inkurajon integrimin e grave në tregun e punës në Kosovë.

Zvicra është e përkushtuar për fuqizimin e grave dhe barazinë gjinore në përputhje me qëllimet e Zhvillimit të Qëndrueshëm 2030, transmeton albinfo.ch.

Në kuadër të këtij angazhimi, Zvicra inkurajon integrimin e grave në tregun e punës në Kosovë.

Në tregun kosovar të punës gratë ende kanë një shkallë shumë të ulët të përfaqësimit. Për këtë arsye është shumë e rëndësishme për Zvicrën që grave t’ua lehtësojë qasjen në tregun e punës dhe t’i promovojë ato vazhdimisht. Rreth 60% e grave të punësuara janë aktive në tregtinë me pakicë. Për këtë arsye Zvicra e mbështet këtë sektor në përpunimin e ofertave për trajnime të mëtutjeshme për menaxhmentin e mesëm, në mënyrë që të përmirësohen shanset e grave për pozita më të larta.

“Ne gjithashtu po e mbështesim trajnimin e 700 grave në sektorin e ëmbëlsirave dhe bukës, në mënyrë që ato të mund të hapin ose të zgjerojnë një biznes. Gratë po mbështeten edhe në sektorin bujqësor, siç është prodhimi i bimëve shëruese dhe aromatike. Si rezultat i mbështetjes zvicerane 1,436 gra kanë gjetur një punë të re në katër vjetët e fundit. Për t’i luftuar paragjykimet dhe stereotipet mbizotëruese në shoqëri, Zvicra ka zhvilluar edhe një fushatë vetëdijesuese për ta promovuar arsimimin e vajzave”, shprehen nga Ambasada e Zvicrës në Kosovë. /Albinfo.ch

https://helvetas-ks.org/eye/en/no-room-for-doubting-women-are-essential-to-the-modern-workforce-/?fbclid=IwAR2roS7R4w4YcqyKS7_49PvCfjo44Laus7DyernO6I8jC3DG7Zf6MH83TUM

---