Zvicër: Më 30 nëntor votohet për tri inicativa popullore

Votohen tri çështje, gjegjësisht tri iniciativa të ndryshme të nivelit nacional. Vendimin për këtë datë e ka marrë dhe e ka shpallur sot Këshilli Federal

Qytetarët zviceranë me të drejtë vote do të dalin më 30 nëntor në votim gjithëpopullor (referendum). Me atë rast ata do të përcaktohen për tri çështje, gjegjësisht tri iniciativa të ndryshme të nivelit nacional. Vendimin për këtë datë e ka marrë dhe e ka shpallur sot Këshilli Federal.

E para dhe më e njohura është iniciativa mjaft e kontestuar “Ecopop”.

E iniciuar nga të liberalet e gjelbër, kjo iniciativë pretendon se në Zvicër ka dendësi të madhe të popullatës, që e dëmton edhe ekuilibrin me natyrën. Sipas bartësve të saj, kjo dendësi vjen nga migracioni dhe rrjedhimisht duhet kufizuar burimet e tij. Ajo që kërkon iniciativa në fjalë është kufizimi i rritjes së popullatës që vjen nga migracioni në shkallën prej 0.2 për qind të popullatës vendëse në tre vjet.

Iniciativa e dytë për të cilën do të votohet më 30 nëntor është ajo për heqjen e tatimeve paushalle. Kjo nënkupton heqjen e mundësisë që pasuria e të huajve të taksohet në mënyrë paushalle. Kjo mënyrë praktikohet te të huajt e pasur që kanë investuar ose kanë sjellë selinë e kompanive të tyre në Zvicër. Duke qenë se shpeshherë tatimet paushalle që u caktohen atyre janë pothuaj simbolike, kjo ka ngjallur pakënaqësi në opinionin zviceran.

Iniciativa e tretë për të cilën pritet të votohet në nivel vendi është e ashtuquajtura “iniciativa e arit”. Ajo kërkon që Banka Nacionale e Zvicrës, 20 për qind të aksioneve të saj t`i ruajë në ari.