Zjarret verore mund t’u kushtojnë miliarda euro vendeve evropiane

Keystone (AP Photo/Emma Da Silva)

Zjarret që po përfshijnë Evropën këtë verë pritet të kenë një kosto të madhe ekonomike për vendet e prekura. Përveç dëmeve mjedisore dhe humbjeve në njerëz, flakët po shkaktojnë shpenzime të larta për shuarjen e zjarreve, rindërtimin e infrastrukturës dhe rikuperimin e zonave të djegura.

Gjatë dy muajve të fundit, rreth 500 mijë hektarë pyje janë shkatërruar në Francë, Spanjë, Portugali, Greqi dhe Rumani. Sipas vlerësimeve të Bashkimit Evropian, vetëm restaurimi i këtyre zonave mund të kushtojë rreth 2.5 miliardë euro në vit, ndërsa disa analiza e çojnë faturën mbi 3 miliardë euro.

Në Francë, autoritetet vlerësojnë se ndikimi ekonomik i valës së të nxehtit dhe zjarreve mund të arrijë nga 3 deri në 6 miliardë euro. Kjo ka nxitur debat politik, me kërkesa për fonde shtesë për blerjen e avionëve zjarrfikës, forcimin e kapaciteteve të shërbimeve të emergjencës dhe përgatitjen për sezonet e ardhshme.

Ekspertët paralajmërojnë se, me shtimin e zjarreve nga viti në vit, kostot për buxhetet publike të vendeve evropiane pritet të rriten ndjeshëm.