Zjarr në qendrën e azilit

Të gjithë ata që ndodheshin në momentin e shpërthimit të zjarrit në godinë, kanë arritur të ikin me kohë nga rreziku

Në Dielsdorf të Cyrihut ka shpërthyer në mbrëmjen e të hënës një zjarr në qendrën e atjeshme për strehimin e azilkërkuesve. Me këtë rast nuk ka pësuar askush nga banorët por janë shkaktuar dëme të mëdha materiale, në lartësi prej disa qindra mijë frangash.

Të gjithë azilkërkuesit dhe të tjerët që ndodheshin në momentin e shpërthimit të zjarrit në godinë, kanë arritur të ikin me kohë nga rreziku, njofton Policia Kantonale e Cyrihut.

Kjo qendër azili, e vendosur në një shtëpi të vjetër banimi, pas zjarrit të pësuar nuk është më e banueshme. Rreth tridhjetë banuesit janë evakuuar dhe përkohësisht janë vendosur në sallën e sporteve të këtij fshati.

Policia thotë se nuk dihet shkaku i zjarrit por aktualisht nuk ka dyshime për zjarrvënie të qëllimtë.