Zhegrova tregon pse zgjodhi Baselin

Ai shtoi se është takuar me sulmuesin shqiptar, Albian Ajetin, derisa do të gjejë edhe Taulant Xhakën

Ylli i Kosovës, Edon Zhegrova edhe zyrtarisht të hënën i është bashkuar Baselit në Zvicër.

Ai është huazuar për 1 vit e gjysmë te skuadra zvicerane nga Genk, ku nuk kishte shumë minuta, derisa në skuadrën e re do të bartë fanellën me numër 30, përcjell albinfo.ch.

“Jam shumë i emocionuar, është ekip i ri, jetë e re për mua. Jam i lumtur që do të jem pjesë e një klubi të madh, më i madhi në Zvicër. Kështu që për mua është diçka fantastike dhe do të jap më të mirën për ta ndihmuar sa më shumë klubin për të fituar ndeshje”, është shprehur anësori nga Prishtina.

“E zgjodha sepse shumë lojtarë kanë të shkëlqyer kanë qenë këtu, kanë luajtur për këtë klub, kështu që është mundësi e mirë për mua që të luaj këtu”, shtoi ai.

Ai shtoi se është takuar me sulmuesin shqiptar, Albian Ajetin, derisa do të gjejë edhe Taulant Xhakën.

Kujtojmë se pjesë e kësaj skuadre kanë qenë edhe Granit Xhaka dhe Xherdan Shaqiri.

---