Votë për ose kundër kantonit të ri

Votimi do të tregojë nëse regjioni Jura do të shkëputet nga Kantoni i Bernës dhe së bashku me kantonin ekzistues Jura, do të formojë një kanton më të madh

Ndër referendumet që zhvillohen në rrafshin kantonal por që kanë rëndësi nacionale është ai për themelimin e një kantoni të ri, më të madh të Jura-s. Për këtë do të votojnë qytetarët me të drejtë vote të regjionit frankofon të Jura-s së Bernës. Ata do të vendosin nëse regjioni i tyre do të shkëputet nga Kantoni i Bernës dhe së bashku me kantonin ekzistues Jura, do të formojë një kanton më të madh, apo do të mbetet në kuadër të Bernës. Njëkohësisht do të votojnë edhe qytetarët e kantonit Jura, nëse e duan një kanton të ri, të rritur me regjionin Jura që tash i takon Bernës, ose jo.

Po-ja eventuale nuk do të thotë themelim automatik të kantonit të ri Jura por vetëm do të nisë një proces në atë drejtim. Në fund të procesit do të ketë edhe një votim në nivel nacional lidhur me këtë çështje.

Por, nga ana tjetër, në rast se në cilindo nga dy regjionet përgjigja në referendum do të jetë Jo, atëherë synimi për të cilin zhvillohet referendumi do të nxirret përfundimisht nga rendi i ditës. Por, megjithatë, edhe në një rast të tillë, disa komuna do të kenë mundësinë që veç e veç të ndërrojnë kantonin.

Jura prej rreth 200 vitesh paraqet një çështje politike me potencial polarizimi të thellë. Para më pak se 40 vitesh është themeluar kantoni Jura, i cili ka kaluar nëpër shumë tensione të ashpra politike, duke shkaktuar edhe trazira të dhunshme.