Von der Leyen: Askush s’mund ta rishkruajë historinë e Kosovës

Presidentja e Komisionit Evropian tha se vendimi i Dhomave të Specializuara ka shkaktuar emocione të fuqishme në Kosovë dhe kërkoi respektimin e institucioneve gjyqësore

Presidentja e Komisionit Evropian, Ursula von der Leyen, gjatë vizitës së saj në Kosovë ka folur edhe për aktgjykimin e Dhomave të Specializuara në Hagë ndaj ish-krerëve të Ushtrisë Çlirimtare të Kosovës, përcjell albinfo.ch.

Në konferencën e përbashkët për media me kryeministrin Albin Kurti, von der Leyen tha se vendimi ka shkaktuar emocione të fuqishme në Kosovë, duke theksuar se historia e vendit nuk mund të rishkruhet.

“Askush nuk mund të rishkruajë historinë e Kosovës. 1999-a është e skalitur në memorien tuaj kolektive – represioni i dhunshëm, kriza humanitare, vuajtja që e ka përjetuar populli juaj. BE-ja ka qëndruar gjithmonë me ju”, deklaroi ajo.

Von der Leyen tha se e çmon, siç u shpreh, angazhimin e matur të institucioneve të Kosovës, ndërsa theksoi se aktgjykimi është dhënë nga një institucion i pavarur gjyqësor dhe se mandati i tij duhet të respektohet.

“Aktgjykimi është dhënë nga një institucion i pavarur gjyqësor dhe mandati i tij duhet të respektohet”, tha presidentja e Komisionit Evropian.

Ajo theksoi gjithashtu se rezistenca e Kosovës nuk ka qenë pjesë e procesit gjyqësor.

“Rezistenca e Kosovës nuk ka qenë në gjykim”, u shpreh von der Leyen.

Gjatë konferencës, presidentja e Komisionit Evropian foli edhe për situatën politike në Kosovë, duke vënë theksin te funksionalizimi i institucioneve, veçanërisht i Kuvendit dhe Qeverisë.

Ajo tha se partitë politike duhet të zhvillojnë dialog për tejkalimin e situatës politike dhe theksoi rëndësinë e stabilitetit institucional, reformave dhe zhvillimit ekonomik.

Vizita e von der Leyen në Kosovë është pjesë e turit të saj në Ballkanin Perëndimor, gjatë të cilit ajo po zhvillon takime me përfaqësuesit institucionalë të vendeve të rajonit./Albinfo.ch

---