Visar Bytyçi, nënkampion bote i saunës

Visari edhe vitin e kaluar pati qenë pjesëmarrës i këtij kampionati, me ç`rast pati fituar vendin e katërt

Kampionati Botëror i mjeshtërve të saunës, (banjës me avull) është një eveniment që ka filluar të mbahet nga viti 2008. Në fundjavën që shkoi, ky kampionat i llojit të veçantë u mbajt në banjën e alpeve austriake Bad Hofgastein, ku rreth 1500 mysafirë të kësaj banje janë bërë dëshmitarë të mjeshtërive nga më të habitshmet të “artistëve” të banjës me avull.

Titullin e kampionit e fitoi për herë të tretë mjeshtri nga Belgjika Dirk van Offel, shkruan Tageszeitung.it Ai ka kënaqur mysafirët me inskenimin e spektaklit “Lord of Elements” me të cilin ka dalë më i suksesshmi ndër 33 pjesëmarrësit që përfaqësonin mbi 20 kombe.

Titullin e nënkampionit në këtë garë e ka fituar shqiptari me qëndrim në Gjermani, Visar Bytyçi. Ai ka bindur jurinë me një inskenim të udhëtimit me saunë në orient. Visari edhe vitin e kaluar pati qenë pjesëmarrës i këtij kampionati, me ç`rast pati fituar vendin e katërt.