Vetëvendosje u drejtohet qytetarëve me një mesazh

Lëvizja Vetëvendosje ka falënderuar qytetarët për besimin e dhënë në zgjedhjet mbajtura ditën e diel, 14 shkurt.

Përmes një komunikate për media, subjekti politik që fitoi bindshëm zgjedhjet e 14 shkurtit në Kosovë thotë se qytetarët e mbështetën këtë subjekt për parimet politike.

“Të dashur qytetarë, ju na keni mbështetur, jo për interesa personale, por për parimet politike dhe qëndrueshmërinë. Mbështetja juaj për Lëvizjen, nuk ka patur ndonjë precedent në historinë e Kosovës, për asnjë subjekt tjetër. Kjo mbështetje tregon mirësinë tuaj dhe dashurinë që keni për atdheun. Dëshira jonë më e madhe tash është që të dëshmojnë me punë dhe nder që ta sjellim ndryshimin që ju prisni, dhe ta meritojmë mbështetjen tuaj”, thuhet në komunikatë.

Vetëvendosje falënderon të gjithë qytetarët për pjesëmarrjen dhe kulturën demokratike të treguar në këto zgjedhje.

“Falënderojmë gjithë mbështetësit e Lëvizjes, që na e sollën këtë moment historik. I falemi nderit prej mërgatës që ka votuar me postë dhe masivisht ka ardhur në Kosovë. Dhe sigurisht, e pamundur është të mos e shprehim vlerësimin për punën e madhe e të palodhur të gjithë aktivistëve dhe vullnetarëve. Në veçanti falënderojmë vëzhguesit e komisionerët e ditës së zgjedhjeve, vëzhguesit e votave të mërgatës, si dhe vëzhguesit e Qendrës së Numërimit që nisin punën nga sot”, vijon komunikata.

LVV falënderon qytetarët edhe për mikpritjen gjatë fushatës zgjedhore.

“Jemi të prekur thellësisht nga bujaria e pamatë e familjeve anëkënd Kosovës që na hapët dyert e zemrën muajin e shkuar, duke na pritur. Ju jemi mirënjohës përjetë. Në çdo shtëpi që ishim u pritëm ngrohtë dhe nuk pati nevojë të thërrasim për më shumë mobilizim se atë punë tashmë e kishte kryer gjyshi a gjyshja deri te nipi e mbesa. Bashkë do ta bëjmë më të mirën për vendin, shoqërinë dhe ekonominë tonë”.

Ndryshe, sipas rezultateve që janë paraqitur deri tani nga Komisioni Qendror i Zgjedhjeve, LVV është duke prirë e para më më së shumti vota në pothuajse të gjitha komunat e Kosovës.