„Varroset“ ideja për qeverinë me 9 anëtarë

Dhoma e Kantoneve ka hedhur poshtë me 21 vota kundër dhe 20 pro dhe nga dy abstenime të dy iniciativat; për shtim të numrit të ministrave dhe për kufizim në 2 ministra nga një regjion i vendit

Dhoma e kantoneve e Parlamentit të Zvicrës i ka dhënë fund përpjekjeve të ndryshme që kanë qarkulluar për shtimin e numrit të ministrave në Këshillin Federal, nga 7 sa janë, në 9 sish. Së fundi propozimi kishte ardhur si iniciativë nga kantoni i Tesinës. Krahas kësaj, nga ky kanton kishte ardhur edhe iniciativa që të mos lejohet që nga një regjion i gjerë i vendit (nga 7 sa janë gjithsej) të ketë më shumë se 2 përfaqësues në qeveri. Por, të dy iniciativat janë hedhur poshtë në Dhomën e Kantoneve.

Komisioni për politika shtetërore i ka rekomanduar deputeteve për ta pranuar iniciativën e parë, për të cilën kishin votuar 9 anëtarë të komisionit ndërsa kundër saj tre të tjerë. Mbështetësit e iniciativës e kanë arsyetuar këtë me shkarkimin e barrës së ministrave. Sipas deputetit Hans Stöckli: “Me dy ministra më shumë dhe kështu me dy departamente plotësuese do të ndaheshin punët më mirë”.

Veç kësaj, sipas Stöcklit, në qeveri do të duhej të përfaqësoheshin të gjitha regjionet gjuhësore. Por kundërshtarët e rritjes së numrit kanë thënë se në një rast të tillë do të dëmtohej kolegjialiteti. “Mandej, ne para pak kohësh tashmë e patëm hedhur poshtë një propozim të tillë”, ka thënë deputeti Peter Föhn.

Ministrja e drejtësisë, Simonetta Sommaruga ka komentuar kështu qëndrimin atyre që kanë kërkuar rritjen e numrit të ministrave: “Nëse vërtetë dëshirohet shkarkimi i barrës nga supet e qeverisë, atëherë do të duhej që numri i tyre të dyfishohet. Dhe kjo do të dëmtonte përfundimisht kolegjialitetin”.

Në fund, Dhoma  e Kantoneve ka hedhur poshtë me 21 vota kundër dhe 20 pro dhe nga dy abstenime të dy iniciativat.