Valë e fortë të nxehti në Paris, qytetarët e kalojnë natën në parqe

Temperaturat pranë niveleve rekord detyruan banorët dhe turistët të kërkojnë freski në hapësirat e gjelbra, ndërsa autoritetet mbajtën të hapur gjatë natës Parkun Buttes-Chaumont.

Parisi po përballet me temperatura të larta pranë niveleve rekord për muajin qershor, duke detyruar shumë banorë dhe turistë të kalojnë natën në parqe për t’i shpëtuar vapës së madhe, transmeton albinfo.ch.

Si masë e veçantë, Parku Buttes-Chaumont, i cili zakonisht mbyllet në mbrëmje, qëndroi i hapur gjatë gjithë natës për vizitorët që kërkonin freski, pasi shumë banesa nuk kanë sisteme të ajrit të kondicionuar.

Shumë qytetarë sollën batanije, pajisje elektronike dhe ushqime, duke e shndërruar parkun në një vendpushim të përkohshëm. Disa prej tyre ndoqën edhe ndeshjet e Kupës së Botës në ambiente të hapura.

Sipas parashikimeve të shërbimit meteorologjik francez, temperaturat pritet të arrijnë nivele rekord afro 40 gradë për këtë periudhë, ndërsa banorët thonë se qëndrimi brenda shtëpive është bërë pothuajse i padurueshëm.

Iniciativa për mbajtjen e parqeve të hapura gjatë natës është mirëpritur nga qytetarët, të cilët e konsiderojnë atë një zgjidhje të dobishme për t’u përballur me valën e të nxehtit./Albinfo.ch

---