Urdhër arrest ndërkombëtar për Netanyahun nga Turqia

Ndër akuzat janë ato për krime kundër njerëzimit dhe gjenocid - Urdhri u lëshua edhe për një shtetas tjetër izraelit dhe ka të bëjë me një hetim mbi kapjen e Flotiljes së Gazës dhe ndalimin e aktivistëve.

Turqia ka lëshuar një urdhër arresti ndërkombëtar kundër kryeministrit izraelit Benjamin Netanyahu dhe një shtetasi izraelit, Afek Moskovitch.

Ministri turk i Drejtësisë Akin Gurlek e ka konfirmuar këtë përmes një njoftimi në “X” teksa u njoftua është pjesë e një hetimi mbi kapjen e Flotiljes së Gazës dhe ndalimin e aktivistëve.

Netanyahu dhe Moskovitch po ndiqen penalisht për “krime kundër njerëzimit, gjenocid, privim të rëndë nga liria, lëndime personale të qëllimshme, torturë, shkatërrim të aseteve, plaçkitje të rëndë dhe përvetësim të mjeteve të transportit”, tha ministri turk, transmeton albinfo.ch.

Përafërsisht 430 anëtarët e ekuipazhit të pesëdhjetë anijeve të hipura nga ushtria izraelite në Mesdhe, në perëndim të Qipros, ishin dërguar me forcë në Izrael dhe më pas ishin mbajtur në burgun Ktziot para se të dëboheshin majin e kaluar.

Duke filluar nga Turqia, aktivistët e Flotiljes Globale Sumud donin të tërhiqnin vëmendjen ndaj situatës humanitare në Rripin e Gazës, të shkatërruar nga më shumë se dy vjet luftë, duke thyer bllokadën detare të vendosur nga Izraeli. Në prill, një Flotilje e mëparshme e Gazës ishte kapur tashmë nga Izraeli pranë brigjeve të Greqis

Një urdhër arresti ishte lëshuar kundër Netanyahut në vitin 2024 nga Gjykata Ndërkombëtare Penale për krime lufte dhe krime kundër njerëzimit në kontekstin e konfliktit në Gaza.

---