U testuan sirenat e alarmit

Në gjithë Zvicrën në orën 13.30 ka jehuar zëri i sirenës për alarmin e përgjithshëm, që ka zgjatur saktësisht 1 minutë

Në Zvicër për çdo vit, të mërkurën e parë të shkurtit bëhet testimi i sirenave në nivel vendi. Bëhet fjalë për gjithsej 7800 sirena të cilave u testohet funksionimi për të ditur gjendjen e tyre në rast të rrezikut të vërtetë.

Kjo ditë ka qenë sot. Në gjithë Zvicrën në orën 13.30 ka jehuar zëri i sirenës për alarmin e përgjithshëm, që ka zgjatur saktësisht 1 minutë. Siç bën të ditur Zyra Federale për Mbrojtje të popullatës (Babs), aty ku ka pasur nevojë, alarmi ka vazhduar deri në orën 14. Ndërsa në mes të orës 14.15 dhe 15.00 është bërë testimi i alarmit të ujit në vendet me penda uji që llogariten si zona të rrezikuara. Të tilla konsiderohen ato zona të cilat në kushte reale mund të vërshohen brenda dy orëve, bëhet e ditur në komunikatën e Babs.

Në rrethana të rrezikut real përmes alarmit porositet popullata që të dëgjojë radion dhe të informojë edhe fqinjët për të ndjekur udhëzimet e mëtejme të autoriteteve kompetente në lidhje me rrezikun. Ndërsa alarmi i vërtetë për vërshim shërben si urdhër për të braktisur menjëherë zonën e rrezikuar.

Autoritetet federale janë duke shqyrtuar mundësinë që sirenat e alarmit të emetohen edhe përmes sms-ve. Në atë mënyrë njerëzit do të alarmoheshin dhe njëkohësisht edhe do të informoheshin lidhur me rrezikun që kërcënon.

Deri në mars të këtij viti dol të dihet nëse në të ardhmen do të ketë një modernizim të sistemit të alarmimit në këtë drejtim.