Trump shpërthen kundër Kombeve të Bashkuara dhe Evropës në OKB, përmend edhe Zvicrën

Presidenti amerikan Donald Trump lëshoi një varg kritikash dhe kërcënimesh të martën para Asamblesë së Përgjithshme të OKB-së në Nju Jork, duke sulmuar vendet që mbështesin emigracionin dhe tranzicionin energjetik, ndërsa konfirmoi mbështetjen e tij të pakushtëzuar për Izraelin.

Në vitin 2018, fjalimi krenar i Trump-it shkaktoi të qeshura mes delegatëve të huaj të mbledhur në OKB. Këtë herë, 79-vjeçari miliarder foli mes një heshtjeje pothuajse të plotë, duke e lavdëruar veten për një “epokë të artë” në Amerikë, duke numëruar sukseset ekonomike dhe duke pretenduar se ka përfunduar “shtatë luftëra” – një listë e çrregullt konfliktesh, disa prej të cilave kishin mbaruar prej kohësh, transmeton albinfo.ch.

Që nga rikthimi i tij në pushtet, shumica e liderëve perëndimorë nuk po e marrin më me humor. Trump ka nisur një ofensivë proteksioniste, ka vënë në pikëpyetje aleancat tradicionale amerikane dhe ka shkurtuar ndihmat ndërkombëtare.

Kritika ndaj OKB-së

Trump akuzoi Kombet e Bashkuara se nuk e kanë ndihmuar në nismat e tij për paqe, duke bërë edhe batuta tallëse:

“Dy gjërat që mora nga Kombet e Bashkuara ishin një shkallë lëvizëse e prishur dhe një teleprompter i prishur,” – tha ai, duke iu referuar problemeve teknike gjatë fjalimit.

Ai gjithashtu akuzoi OKB-në për “financimin e një sulmi kundër vendeve perëndimore dhe kufijve të tyre”, duke iu referuar ndihmës financiare për emigrantët. Presidenti amerikan, i cili ka nisur një operacion të gjerë për dëbimin e emigrantëve të paligjshëm, u tha vendeve evropiane që nuk veprojnë njësoj se do të shkojnë “në ferr”.

Sulmi ndaj Evropës dhe klimës

Trump akuzoi Evropën për politikat e tranzicionit energjetik, duke e quajtur ndryshimin klimatik “mashtrimin më të madh në histori”.

Kjo ide globaliste që u kërkon vendeve të industrializuara të dëmtojnë vetveten dhe të prishin shoqëritë e tyre duhet të refuzohet,” – shtoi ai.

Në fjalimin e tij, Trump tha gjithashtu se njohja e një shteti palestinez do të ishte një “shpërblim” për “mizoritë” e Hamasit.

Takime dypalëshe

Në Nju Jork, Trump do të zhvillojë bisedime me presidentin ukrainas Volodymyr Zelensky dhe atë argjentinas Javier Milei, si dhe një takim me liderë nga disa vende myslimane – Katar, Arabinë Saudite, Indonezi, Turqi, Pakistan, Egjipt, Emiratet e Bashkuara Arabe dhe Jordani.

Ndërkohë, Këshilli i Sigurimit i OKB-së do të diskutojë të martën për luftën në Rripin e Gazës, por Izraeli nuk do të marrë pjesë, duke protestuar se mbledhja po mbahet gjatë Vitit të Ri hebre.

Trump njoftoi gjithashtu se javën e ardhshme do të takohet me presidentin brazilian Luiz Inacio Lula da Silva, të cilin e akuzon për persekutimin e paraardhësit të tij Jair Bolsonaro.

“Zvicra e bukur” dhe emigracioni

Duke folur për emigracionin, Trump përmendi edhe Zvicrën, duke thënë se as ajo nuk është imune ndaj emigracionit të paligjshëm.

“Shumë vende po shkatërrohen nga emigracioni i paligjshëm, përfshirë Zvicrën e bukur, ku 72% e të burgosurve janë të huaj,” – deklaroi ai.

Sipas të dhënave të Zyrës Federale të Statistikave, në janar 2025, 72.5% e të burgosurve në Zvicër nuk kishin pasaportë zvicerane.

Trump shtoi se edhe “revolucioni i gjelbër” po e çon Evropën drejt shkatërrimit, duke përsëritur se ndryshimi klimatik është “mashtrimi më i madh kundër njerëzimit”.

 

---