Të paktën 70 të vdekur dhe dhjetëra të zhdukur nga përmbytjet në Indi dhe Nepal

Të paktën 56 persona kanë humbur jetën në Indi dhe 14 persona kanë vdekur në Nepal si pasojë e shirave të rrëmbyeshëm dhe stuhive që kanë shkaktuar përmbytje dhe rrëshqitje dheu.

Të paktën 11 të tjerë rezultojnë të zhdukur teksa autoritetet në Nepal kanë paralajmëruar të dielën se ekziston mundësia për përmbytje të tjera të menjëhershme.

Shteti verior indian i Uttar Pradesh-it ka regjistruar 66,5 mm reshje shiu midis 25 shtatorit dhe mëngjesit të 27 shtatorit, krahasuar me nivelin normal prej 7,6 mm për këtë periudhë, ka deklaruar të dielën Hrishikesh Bhaskar Yashod, komisioneri shtetëror për menaxhimin e emergjencave, transmeton albinfo.ch.

Përveç 56 viktimave, 46 persona kanë mbetur të lënduar dhe më shumë se 1 000 shtëpi janë dëmtuar.

Autoritetet nepaleze kanë paralajmëruar për mundësinë e përmbytjeve të menjëhershme në 49 nga 77 distriktet e vendit, ku më shumë se gjysma e tyre përballen me rrezik të lartë përmbytjesh, ndërsa nivelet e ujit në lumenjtë dhe degët kryesore vazhdojnë të rriten.