“Të bijtë e Sefës” liderë të folklorit shqiptar

Në Festivalin mbarëkombëtar folklorik “Oda e Llapushës” me rastin e Ditëve të Mërgatës, “Të bijtë e Sefë Mleqanit” dhe SHKA “Shote Galica”, dolën fitues

“Të bijtë e Sefë Mleqanit” nga Mleqani i Malishevës dhe Shoqata
Kulturore e Artistike “Shote Galica” nga Drenasi, kanë dalë fitues të
Festivalit mbarëkombëtar folklorik “Oda e Llapushës”, që u organizua
nga Komuna e Malishevës, në kuadër të shënimit të Ditëve të Mërgatës
dhe të Diasporës.

Ky festival i ndarë në dy cikle, ka përfunduar në orët e mesnatës,
ndërsa në mesin e dhjetëra rapsodëve dhe grupeve folklorike, juria
profesionale, në përbërje nga prof.Dr. Adem Zejnullahu, prof..Dr.
Mehmet Rukiqi dhe Sami Piraj, kanë zgjedhur fitues SHKA “Shote Galica”
dhe “bijtë e Sefë Mleqanit”.

Drejtoresha për Kulturë, Rini dhe Sport e komunës së Malishevës,
Blerta Krasniqi i falënderoi të gjithë për kontributin e dhënë në
mbajtjen e festivalit, ndërsa dy ditët e fundit i konsideroi si festën
më të madhe të kësaj komune.

“Ju të gjithë pjesëmarrësit nga Kosova, Shqipëria, Maqedonia, Mali i
Zi, nga Lugina e Preshevës e nga Diaspora, që çdo herë kontribuoni
shumë, na zbukuruat qytetin tonë, dhatë dritë me zërin tuaj të bukur e
me vallet e mrekullueshme, edhe atëherë kur dritat elektrike nuk na
punonin mirë”, tha mes tjerash Krasniqi.

Vendi i dytë në këtë festivalit iu nda “Vëllezërve Kryeziu” nga
Mleqani dhe vendi i tretë po ashtu u nda rapsodëve Bajram Baja me
grupin nga Banja dhe Sylë Nishorit nga Theranda. Ndërsa Çmimi i
“Veterani i folklorit” ju nda rapsodit Sejdi Morina, ndërsa çmimi
“Beqir Gashi”, për debutuesit më të mirë ju nda Pëllumb Gashit nga
Drenasi.

Në këtë festival po ashtu u nda edhe çmimi i karrierës për kontribut
në rapsodi, të cilën pa konkurrencë e fitoi rapsodi Ali Krasniqi.

Çmimin kryesor “Sali e Feriz Krasniqi” e ka ndarë, kryetari i Komunës
së Malishevës, Ragip Begaj.

Në festivalin folklorik “Oda e Llapushës” kanë marrë pjesë emrat më të
njohur të folklorit shqiptarë: Ali Krasniqi’ SHKA ” Salih e Feriz
Krasniqi; “Të bijtë e Sefë Mleqanit; SHKA ” Muharrem e Xhevat Qena
“SHKA ” Jehona e Dukagjinit, rapsodi Islam Hasi, rapsodi Agim Korpuzi;
rapsodi Lul Sejdiu; Fatmir Bajra; vëllezërit Çeta; rapsodët Liti dhe
Biti; vëllezërit Zogaj; Gëzim Bytyçi; Ansambli i valleve ” Llapusha;
SHKA “Shotë Galica”; Ferid Dida me grupin e Kukësit etj.