Takimi i ministrave të jashtëm të BE-së: Diskutohet për armëpushim mes Izraelit dhe Hamasit

Foto nga arkiva (KEYSTONE/AP Photo/Fatima Shbair)

Ministrat e Jashtëm të Bashkimit Evropian në takimin e sotëm që po zhvillohet në Bruksel, po diskutojnë për pauzat humanitare dhe armëpushimet në luftën mes Izraelit dhe Hamasit.

“Në këtë deklaratë të 27 vendeve, ne kërkojmë pauza të menjëhershme. Po e them në shumës. Jo një të vetme, por disa pauza”, ka thënë para fillimit të bisedimeve, shefi i diplomacisë së Bashkimit Evropian, Josep Borrell.

Tutje, sipas tij, këto pauza të menjëhershme dhe korridore humanitare duhet të krijohen për të përballuar situatën e rëndë të njerëzve në Gaza.

“Ne i kërkojmë Izraelit të tregojë përmbajtje maksimale për të shpëtuar jetët e civilëve. Ne dënojmë përdorimin nga Hamasi të njerëzve dhe spitaleve si mburoja, por edhe shprehim shqetësimin tonë për situatën e rëndë të spitaleve që po preken rëndë nga bombardimet”, ka shtuar tutje ai.