Stoltenberg: Sulmi në Banjskë, dëshmi se konflikti mund të kthehet në Ballkanin Perëndimor

Sekretari i NATO-s, Jens Stoltenberg, pas takimit me presidenten e Kosovës, Vjosa Osmani, ka deklaruar se sulmi në Banjskë, i 24-shtatorit ishte shenjë që konfliktet mund të rikthehen në Ballkanin Perëndimor.

“Ne kishim një diskutim të rendësishëm rreth situatës së sigurisë në Kosovë dhe rajon. Në shtator ne pamë një sulm serioz në veri të Kosovës. Në maj ushtarët e KFOR-it u sulmuan. 93 ushtarë u lënduan rëndë dhe disa prej tyre edhe me rrezik për jetë”, u shpreh ai, përcjell albinfo.ch.

Stoltenberg ndër të tjera u shpreh se aktet e tilla janë të papranueshme dhe se përgjegjësit duhet të dalin para drejtësisë.

Në anën tjetër, presidentja e Kosovës, Vjosa Osmani, u shpreh se nëse Serbia nuk përballet me asnjë masë, do të jetë inkurajim për sulme të tjera, ndërsa ka thënë se Kosova dhe NATO janë në njërën anë, terroristët janë në anën tjetër.

“Anëtarësimi në NATO është qëllim i Kosovës. Përfshirja në partneritetin për paqe, e pastaj edhe anëtarësimi në NATO është garanci për rajonin. Stërzgjatja e këtij procesi prodhon pasoja”, ka thënë ajo.

 

---