Sommaruga u përgjigjet kritikave rreth “Iniciativës…”

Sommaruga ka kundërshtuar kërkesat që të huajt nga shtetet e BE-së të kenë mundësi pune katër mujore në Zvicër

Të mërkurën që shkoi,  Këshilli Federal i Zvicrës ka miratuar projektligjin që rregullon mënyrën e jetësimit të Iniciativës kundër Migraionit Masiv. Kjo iniciativë është votuar nga populli më 9 shkurt të vitit 2014 ndërsa, miratimi i projektligjit i bërë një vit më vonë, ka qenë shkas për kritika të ashpra që bartësja e kësaj iniciative, partia SVP/UDC i ka drejtuar në vazhdimësi qeverisë.

Edhe pas miratimit, kritikat ndaj Këshillit Federal vetëm sa janë shtuar. Tash ato vinë nga palë të ndryshme.

Presidentja e federatës, njëherësh ministre e drejtësisë, Simonetta Sommaruga u është kundërvënë këtyre kritikave, sidomos atyre që vinë nga ekonomia.

Sommaruga në një intervistë dhënë për emisionin Samstagrundschau të Radios SRF ka kundërshtuar kërkesat që të huajt nga shtetet e BE-së të kenë mundësi pune katër mujore në Zvicër pa hyrë në kontingjentet vjetore të parapara me iniciativë.

Qëndrimi që të mos ketë mundësi pune për disa muaj, sipas Sommaruga-s është marrë në mënrë që të pamundësohet kthimi i statusit të punëtorëve sezonalë, qe është hequr disa vite më parë.