Sllovakia nuk pranon refugjatë myslimanë, kritika nga KE

"Refugjatët myslimanë nuk mund të pranohen pasi që në Sllovaki nuk ka xhamia. Prandaj ata refugjatë nuk do të ndjehen mirë në një ambient të tillë..."

Pasi që Sllovakia ka shpallur qëndrimin që të pranojë vetëm refugjatë të krishterë kanë pasuar kritikat nga Kësjhilli i Evropës. Sekretari i Përgjithshëm i këtij këshilli, Thorbjörn Jagland ka shpërndarë dje përmes rrjetit twitter një deklaratë në të cilën shkruan: “Të refuzohen refugjatët për shkak të religjionit të tyre është një diskriminim eklatant”. Prandaj Sllovakia duhet të ndryshojë qëndrimin.

Në arsyetimin e një zëdhënësi të qeverisë sllovake të dhënë për BBC thuhet se refugjatët myslimanë nuk mund të pranohen pasi që në Sllovaki nuk ka xhamia. Prandaj ata refugjatë nuk do të ndjehen mirë në një ambient të tillë dhe nuk mund të integrohen. Ai po ashtu ka shprehur frikën se në mesin e refugjatëve mund të ketë edhe terroristë

Planin që BE-ja e pati bërë në muajin qershor për shpërndarjen e dhjetëra mijë refugjatëve në shtetet anëtare e patën bllokuar shtetet si: Sllovakia, Hungaria, Polonia dhe Cekia. Ato ishin shprehur të gatshme për të ndihmuar por vetëm mbi baza vullnetare.