Si të kufizohet rikthimi i peshës pas ndalimit të barnave kundër obezitetit?

@pixabay

Barnat moderne kundër obezitetit si Ozempic, Wegovy dhe Mounjaro ndihmojnë në humbjen e peshës, por sipas një studimi të publikuar në British Medical Journal, pesha e humbur mund të rikthehet relativisht shpejt pas ndërprerjes së tyre.

Sipas analizës, pacientët rifitojnë mesatarisht rreth 400 gramë në muaj, ndërsa pesha fillestare mund të rikthehet brenda një deri në dy vjet. Në të njëjtën kohë, përfitimet shëndetësore si përmirësimi i sheqerit në gjak, tensionit dhe kolesterolit, priren të ulen pas ndalimit të trajtimit.

Specialistët e konsiderojnë obezitetin një sëmundje kronike, duke theksuar se ndërprerja e mjekimit shpesh sjell rikthim të gjendjes së mëparshme, ngjashëm me sëmundje të tjera kronike si diabeti i tipit 2.

Mjekët paralajmërojnë gjithashtu se humbja e shpejtë e peshës mund të përfshijë edhe humbje të masës muskulore, gjë që ngadalëson metabolizmin dhe favorizon rikthimin e kilogramëve.

Për të kufizuar efektin “yo-yo”, ekspertët rekomandojnë ndjekje të vazhdueshme mjekësore, aktivitet fizik me ushtrime force, si dhe ushqyerje të balancuar me proteina të mjaftueshme. Gjithashtu sugjerohet që ndërprerja e trajtimit të bëhet gradualisht, jo në mënyrë të menjëhershme.

Sipas specialistëve, shumë pacientë kanë nevojë për trajtim afatgjatë për të ruajtur rezultatet dhe për të menaxhuar obezitetin si sëmundje kronike.