Shtetet e Bashkuara të Amerikës me taksa të reja për makinat dhe kamionët evropianë

Presidenti Donald Trump njoftoi se javën e ardhshme tarifa do të rritet në 25%.

Do të vijnë taksa të reja nga SHBA-ja për makinat evropiane, sipas njoftimit nga presidenti i Shteteve të Bashkuara të Amerikës, Donald Trump.

Përmes njoftimit në rrjetin e tij social ai deklaroi: “Duke pasur parasysh faktin se Bashkimi Evropian nuk po e respekton marrëveshjen tonë tregtare të dakordësuar plotësisht, shkruan ai, javën tjetër do të rris taksat e aplikuara ndaj Bashkimit Evropian për makinat dhe kamionët që hyjnë në Shtetet e Bashkuara. Taksa do të rritet në 25%”, transmeton albinfo.ch.

Trump më pas siguron se “është plotësisht e kuptueshme dhe e rënë dakord që, nëse prodhojnë makina dhe kamionë në fabrikat amerikane, nuk do të ketë taksa.

Shumë fabrika makinash dhe kamionësh janë aktualisht në ndërtim e sipër, me mbi 100 miliardë dollarë të investuar, një rekord në historinë e prodhimit të makinave dhe kamionëve. Këto fabrika, me staf amerikan, do të hapen së shpejti. Nuk ka pasur kurrë diçka të ngjashme me atë që po ndodh sot në Amerikë!”.

---