Shqipëri: Të rinjtë u goditën më së shumti nga pandemia

KEYSTONE/EPA/Malton Dibra

Një vit pas pandemisë dhe 3 muaj para zgjedhjeve parlamentare, situata ekonomike në Shqipëri është e paqëndrueshme. Humbjet reale të shkaktuara në tregje dhe buxhet, kanë ndikuar thellësisht edhe në gjendjen shpirtërore të individëve. Sondazhi i MRB i prezantuar në Euronews Albania, zbulon se 48% e qytetarëve kanë ndjesi ankthi për situatën ekonomike, përcjell Albinfo.ch.

Madje, 7% e tyre po e përjetojnë më rëndë, kur thonë se janë nervozë, një gjendje kjo që shkon përtej shqetësimit. Anketa zbulon se ky përjetim është më i shprehur tek mosha 18 deri në 24 vjeç. Ndërkohë, aspekti pozitiv reflektohet tek 56% e të pyeturve, prej të cilëve 28% e shohin situatën ekonomike të vendin me optimizëm.

Azmi Stringa, ekspert ekonomike thotë se qytetarët janë më të varfër nga pandemia por edhe më të pasigurt. Z. Stringa shprehet se përballë një pasigurie globale, në aspektin lokal duhet të mos bëjmë keq menaxhime në mënyrë që problemet të adresohen dhe efekti të jetë minimal. Eksperti thotë se vetëm duke e kthyer ekonominë në konkurruese dhe duke çliruar tregun do të mund të ndalohet largimi i të rinjve që vjen pikërisht për shkak të pasigurisë për të ardhmen.

“Fatkeqësisht duhet të kuptojnë diçka, fokusi duhet të jetë tek të rinjtë. Borxhi është një kosto për brezin e ri. I gjithë thelbi është të mos djegim rininë dhe ccfarë masash duhet të marrim për të investuar për ta”, tha ai.

Sipas ekspertit të ekonomisë inovacioni, arsimimi dhe çlirimi i tregut në mënyrë që të rinjtë të konkurrojnë mund të luajnë një rol vendimtar në frenimin e largimit të të rinjve pasi në të kundërt ekonomia do të ketë pasoja.

“Nëse largohen të rinj do të kemi problem në financat publike dhe pensione. Të rinjtë janë goditur më shumë nga kjo situatë. Ata nuk kanë sigurime mjaftueshëm, një pjesë e tyre janë të angazhuar në punë informale. Koston nuk e kanë mbajtur vetëm ata, por edhe prindërit”, shtoi ai.