Shpëtohen mbi 700 refugjatë afrikanë

Nga fillimi i vitit në brigjet italiane kanë mbërritur 22 mijë refugjatë, që është dhjetë herë më shumë se në periudhën e njëjtë të vitit të kaluar

Marina italiane ka shpëtuar 300 refugjatë qe po lundronin në një anije në Detin Mesdhe, në afërsi të brigjeve të Sicilisë. Në bordin e anijes është gjetur kufoma e një burri, i cili nuk kishte mundur të mbijetonte lundrimin disaditësh nëpër Mesdhe.

Refugjatët pritet që të zbarkojnë sot (e mërkurë) në portin sicilian Pozzallo.

Ndërkohë, në Porto Empedocle, afër qytetit sicilian Agrigent, pritet që gjatë ditës së sotme të zbarkojnë edhe 468 refugjatë tjerë afrikanë, që po ashtu janë shpëtuar nga marina italiane, shkruan nzz.ch.

Nga fillimi i vitit në  brigjet italiane kanë mbërritur 22 mijë refugjatë nga Afrika. Ky numër është për dhjetë herë më i madh se ai i regjistruar në periudhën e njëjtë të vitit të kaluar.