Shpërthime të fuqishme zjarri në pyjet e Zvicrës së Jugut

Në mbrëmjen e të martës në pyjet e dy regjioneve fqinje, në jug të Zvicrës: në Misox të Graubündenit dhe Leventina të Tiçinos kanë shpërthyer zjarre të fuqishme

Sipas policisë Kantonale të Graubündenit rreth orës 22 një hapësirë prej 400 metrash gjerësi dhe 700 metrash gjatësi ishte e përfshirë nga zjarri, transmeton albinfo.ch lajmin e publikuar nga mediat zvicerane.

Për të shuar zjarrin dhe për të parandaluar zgjerimin e tij ishin mobilizuar zjarrfikës dhe forca tjera të shpëtimit. Për shkaqe sigurie, është dashur të bllokoheshin përkohësisht rrugët automobilistike A13 dhe H13. Ato nga ora 19.30 janë të bllokuara tërësisht edhe për shkak të rrezikut nga rrëshqitja e gurëve.

Sipas informatave të deritashme nuk ka asnjë të lënduar si pasojë e këtij zjarri. Por, për shkak të erës që frynte, zjarri mund të përhapej edhe më tutje, kështu që në orët e vona të natës, po vazhdonin punët për shuarjen dhe izolimin e zjarrit. Mbetet i panjohur shkaku i shpërthimit të zjarrit.

Ndërsa lidhur me zjarrin që shpërtheu në Leventina të Tiçinos është detyruar të angazhohej edhe Rega, shërbimi për shpëtim me helikopterë, përcjell albinfo.ch. Gjithsej 15 persona janë evakuuar me Rega mbrëmë rreth orës 20 nga lokaliteti i përmendur ka thënë për srf një zëdhënës i Rega-s. Por, ai ka theksuar se evakuimi është bërë më shumë si masë preventive. Asnjë person nuk ka marrë lëndime nga ky shpërthim zjarri.