Shpërndahen 14 mijë libra për fëmijët në diasporë

I(KEYSTONE/Georgios Kefalas)

Rreth 14 mijë libra shkollorë u janë shpërndarë nxënësve në diasporën shqiptare, ku numërohen rreth 20 mijë nxënës që frekuentojnë kurset e gjuhës shqipe në gjithë botën, e të cilët mund të zgjedhin të përdorin edhe tekstin digjital krahas atij fizik.

Lajmi u bë i ditur nga ministri për Evropën dhe Punët e Jashtme të Shqipërisë, Igli Hasani, i cili shprehu mirënjohje dhe falënderim për 719 mësuesit që japin mësim në këto kurse.

Në maj të këtij viti, me kujdesin e veçantë të Kryeministrit shqiptar, Edi Rama, u hap programi “Mësues për Greqinë”, me synimin për t’u shtrirë edhe në vende të tjera, ku jeton diaspora, transmeton albinfo.ch.

“Me propozimin e Ministrisë për Evropën dhe Punët e Jashtme dhe Ministrisë së Arsimit dhe Sportit, po ndiqen hapat ligjorë për rregullimin e procesit mësimor dhe përzgjedhjen e arsimtarëve në diasporë, në zbatim të marrëveshjeve dypalëshe ndërkombëtare dhe në përputhje me legjislacionin e vendit pritës të diasporës shqiptare”, shkruan Hasani.