SGB: Ja përse jemi për caktimin e pagës minimale

SGB ka prezantuar kërkesat e saj një ditë pas publikimit të studimit mbi pagat në Zvicër, studim ky që dëshmon për diskriminimin në rrafshin gjinor

Federata e Sindikatave të Zvicrës SGB e ka publikuar sot arsyetimin e saj lidhur me fushatën për t`i thënë Po iniciativës për pagën minimale.

Në këtë arsyetim veç tjerash thuhet se në rast të fitores së iniciativës, femrat do të trajtohen në mënyrë më të barabartë se aktualisht. Siç dihet, sipas të gjitha statistikave, femrat për punën dhe nivelin e njëjtë profesional paguhen dukshëm më pak se meshkujt, njofton SGB.

Por, në afat më të gjatë nevojitet shumë më tepër kontrollim dhe transparencë në mënyrë që ndërmarrjet t`i paguajnë femrat njësoj sikur meshkujt.

SGB ka prezantuar kërkesat e saj një ditë pas publikimit të studimit  mbi strukturën e pagave në Zvicër, studim ky që dëshmon për diskriminimin në rrafshin gjinor. Bëhet fjalë për një dallim prej 18.9 për qind në mes të meshkujve dhe femrave.

Më 18 maj zviceranet me të drejtë vote do të votojnë në referendum lidhur me iniciativën për pagën minimale.