Serwer: Padia për Serbinë nuk mbështetet nga BE dhe SHBA

Për Serwer-in, ky veprim i Qeverisë së Kosovës, do ta drejtonte procesin e bisedimeve drejt një rruge të paqartë ku “as Brukseli e as Uashingtoni nuk do ta mbështesnin më”.

Profesori amerikan dhe njohësi i çështjeve të Ballkanit Perëndimor, Daniel Server, në një intervistë për Zërin e Amerikës, ka thënë se padia që Kosova po planifikon t’ia bëjë Serbisë për gjenocid në Gjykatën Ndërkombëtare të Drejtësisë, do t’i vështirësonte bisedimet mes këtyre dy shteteve.

Për Serwer-in, ky veprim i Qeverisë së Kosovës, do ta drejtonte procesin e bisedimeve drejt një rruge të paqartë ku “as Brukseli e as Uashingtoni nuk do ta mbështesnin më”.

Profesori amerikan thotë se e ka të paqartë edhe mënyrën se si Kosova do ta bëjë padinë, pasi nuk është pjesë e Kombeve të Bashkuara.

“Problemi është se edhe nëse kishte tendenca për ta zhdukur krejtësisht ose një pjesë të një grupi etnie, race apo religjioni, është e paqartë se si Kosova do të mund të adresohet në GJND”, shtoi Serwer.

Ai thekson se është skeptik nëse “GJND-ja fillimisht do ta pranonte lëndën”.

Ndërkohë Kryeministri i Kosovës, Albin Kurti, e ka ripërsëritur edhe njëherë që Kosova do të bëj padi ndaj Serbisë për gjenocid gjatë luftës së fundit, duke u shprehur i bindur që Serbia ka kryer gjenocid.

“Kemi filluar punën për ngritjen e padisë për Serbinë. Do t’iu njoftojmë për këto përgatitje. Janë përgatitje gjigante, dhe një rast i tillë nuk guxon të humbet. Ne jemi të bindur që Serbia ka kryer gjenocid në Kosovë, dhe kjo e meriton një padi. Dhe Qeveria e ka obligim ndaj historisë dhe ndaj ardhmërisë sonë”, kishte thënë Kurti para një jave.

Edhe ish-Presidenti i Kosovës, Hashim Thaçi, disa herë është zotuar se Kosova do të bëjë padi kundër Serbisë për gjenocidin e bërë në Kosovë, por një gjë e tillë nuk ka ndodhur as pas dy dekadave të përfundimit të luftës në Kosovës.

Sipas publikimit të Fondit për të Drejtën Humanitare gjatë periudhës 1998-2000 në Kosovë janë vrarë dhe zhdukur 13.535 njerëz.

 

---