Sanksionet e reja amerikane kundër Putinit përfshijnë edhe dy vajzat e tij

Shtetet e Bashkuara po sanksionojnë dy banka të mëdha ruse, fëmijët e presidentit Vladimir Putin dhe ministrin e Jashtëm Sergei Lavrov.

Shtëpia e Bardhë tha se sanksionet do të godasin institucionin më të madh financiar të Rusisë, “Sberbank”, dhe bankën më të madhe private ruse, “Alfa Bank”. Ky veprim ngrin çdo pasuri të lidhur me sistemin financiar të SHBA-së dhe ndalon individët amerikanë të bëjnë biznes me ta, përcjell Albinfo.ch.

Familja e Putinit dhe disa nga anëtarët më të afërt të rrethit të tij politik po sanksionohen gjithashtu.

Dy vajzat e rritura të Putinit, gruaja dhe vajza e ministrit të Jashtëm Lavrov dhe anëtarët e Këshillit të Sigurimit të fuqishëm të Rusisë, përfshirë ish-presidentin dhe kryeministrin Dmitry Medvedev dhe kryeministrin aktual, Mikhail Mishustin, janë në shënjestër të sanksioneve.

“Këta individë janë pasuruar në kurriz të popullit rus. Disa prej tyre janë përgjegjës për ofrimin e mbështetjes së nevojshme për të mbështetur luftën e Putinit kundër Ukrainës. Ky veprim i shkëput ata nga sistemi financiar i SHBA-së dhe ngrin çdo pasuri që ata mbajnë në Shtetet e Bashkuara”, thuhet në një deklaratë të Shtëpisë së Bardhë.

---