Rritet trafiku ajror, bien fitimet në 2026

(KEYSTONE/Gaetan Bally)

Linjat ajrore në mbarë botën pritet të transportojnë më shumë pasagjerë në vitin 2026, por të realizojnë vetëm gjysmën e fitimeve krahasuar me një vit më parë, sipas parashikimeve të Shoqatës Ndërkombëtare të Transportit Ajror (IATA).

Sipas të dhënave të prezantuara në kongresin e IATA-s në Rio de Janeiro, kompanitë ajrore anëtare – që përfaqësojnë rreth 85% të trafikut global – pritet të transportojnë rreth 5.1 miliardë pasagjerë gjatë vitit 2026. Kjo shënon një rritje prej 2.4% krahasuar me vitin 2025, kur numri i udhëtarëve arriti në 4.98 miliardë.

Duke folur për situatën në sektor, drejtori i përgjithshëm i IATA-s, Willie Walsh, tha se nuk e sheh gjendjen si krizë, pavarësisht tensioneve në Lindjen e Mesme dhe ndikimeve të tjera gjeopolitike.

Megjithatë, rritja e trafikut nuk po shoqërohet me përmirësim të fitimeve. IATA parashikon që fitimet e linjave ajrore do të bien nga 45 miliardë dollarë në 2025 në 23 miliardë dollarë në 2026, ndërsa marzha neto do të ulet nga 4.2% në 2.0%.

Sipas organizatës, fitimi mesatar për pasagjer do të jetë rreth 4.50 dollarë, rreth gjysma e vitit të kaluar. Rritja e çmimit të karburantit, e lidhur pjesërisht me tensionet në Lindjen e Mesme, mbetet një nga faktorët kryesorë që po rëndon industrinë.

Parashikimet tregojnë edhe ndryshime rajonale, ku linjat ajrore të Lindjes së Mesme pritet të kalojnë në humbje, ndërsa ato evropiane parashikohet të jenë më fitimprurëset në vitin 2026.