Rritet sërish puna e përkohshme në Zvicër, bien punësimet e përhershme

Sipas Swissstaffing, orët e punës së përkohshme u rritën me 1.5 për qind në gjysmën e parë të vitit, ndërsa punësimet e përhershme ranë me gati 20 për qind.

Puna e përkohshme po rikthehet në rritje në Zvicër, pas disa vitesh rënie të ndjeshme. Sipas të dhënave të publikuara nga Swissstaffing, shoqata zvicerane e agjencive të rekrutimit, numri i orëve të punës së përkohshme në gjysmën e parë të vitit 2026 u rrit me 1.5 për qind krahasuar me të njëjtën periudhë të vitit 2025, përcjell albinfo.ch.

Në të njëjtën kohë, punësimet e përhershme kanë pësuar një rënie të ndjeshme. Sipas raportit, numri i vendosjeve në punë me kontrata të përhershme ka rënë me afro 20 për qind.

Swissstaffing e lidh këtë zhvillim me pasiguritë në ekonominë globale, duke përmendur tensionet e vazhdueshme gjeopolitike dhe politikat e paparashikueshme tarifore të administratës së presidentit amerikan Donald Trump.

Sipas shoqatës, këto rrethana kanë bërë që shumë kompani të tregohen më të kujdesshme në punësimin afatgjatë, duke u orientuar më shumë drejt kontratave të përkohshme për të ruajtur fleksibilitetin në një klimë ekonomike të pasigurt.

---