Rekord i studentëve të huaj në SHBA

Për ndjekjen e studimeve të larta Shtetet e Bashkuara të Amerikës janë ende destinacioni më i preferuar për studentët e huaj.

Numri  i studentëve ndërkombëtarë që studiojnë në Shtetet e Bashkuara të Amerikës është në rritje. Shifrat e njoftuara nga raporti „Dyer të Hapura mbi Shkëmbimin Ndërkombëtar të Arsimimit“ tregojnë se numri i studentëve të huaj që studiojnë në kolegje dhe universitete amerikane u rrit me 7 për qind në vitin akademik 2012-2013. Kjo përbën një rekord të ri prej gati 820 mijë studentësh, ndërkohë që trupi pedagogjik parashikon që kjo prirje të vazhdojë.

Për ndjekjen e studimeve të larta, Shtetet e Bashkuara janë ende destinacioni më i preferuar.

Megjithëse numri i amerikanëve që studiojnë nëpër botë u rrit 3 për qind, në gati 300 mijë studentë vitin e kaluar, më pak se 10 për qind e studentëve amerikanë kanë studiuar nëpër botë dhe shumcia e tyre vetëm për një semestër.

Një kritikë tjetër ka të bëjë me ligjet amerikane të imigracionit, që kufizojnë shumë numrin e studentëve të aftë për të jetuar dhe punuar në Shtetet e Bashkuara pasi përfundojnë studimet.

Siç raporton VoA, ligjvënësit amerikanë po shqyrtojnë alternativa të tjera për të mbajtur në Amerikë studentët më të mirë, por Evan Ryan, ndihmëssekretar i Shtetit për çështjet e arsimit dhe kulturës, thotë se ligjet e tanishme pasqyrojnë politikën amerikane.
 
Studentët ndërkombëtarë sjellin 24 miliardë dollarë në ekonominë amerikane, pasi shumica paguajnë bursë të plotë për arsimin e tyre. Destinacionet e tyre të preferuara: Kalifornia, Nju-Jorku dhe Teksasi.