Rega, 130 fluturime gjatë ditëve festive

Njëri nga katër rastet e fluturimeve të tilla është realizuar nga Kosova, gjegjësisht nga Aeroporti i Prishtinës

Shërbimi zviceran i shpëtimit nëpërmes ajrit, Rega, vetëm gjatë ditëve 31 dhjetor 2013 deri më 2 janar 2014 ka realizuar 130 fluturime me qëllim shpëtimin e jetëve të njerëzve.

Sipas një komunikate të bërë nga vetë Rega, në shumicën e rasteve fjala ka qenë për shpëtimin e njerëzve që kanë pësuar në aksidente të lidhura me sportet dimërore.

Helikopterët e këtij shërbimi gjatë ditës së parë të vitit 2014 kanë bërë 66 fluturime shpëtimi. Në këtë numër hyjnë edhe katër fluturime me qëllim sjelljen në Zvicër të personave të siguruar në Zvicër që janë sëmurë jashtë vendit. Këto quhen “fluturime riatdhesimi”.

Njëri nga katër rastet e fluturimeve të tilla është realizuar nga Kosova, gjegjësisht nga Aeroporti i Prishtinës. Tri fluturime të tjera janë bërë nga Alicante, Egjipti dhe Kameruni.

Ndërkohë një aeroplan-ambulancë ka fluturuar në drejtim të Amerikës Latine, për të sjellë në Zvicër dy zviceranë të aksidentuar nga Argjentina dhe Kolumbia,  që priten të kthehen në Aeroportin e Cyrihut këtë të diel, më 5 janar.