Rama: Marrëveshja për emigrantët, model për vendet tjera

Keystone (AP Photo/Franc Zhurda)

Kryeministrja italiane, Giorgia Meloni gjatë një interviste me gazetarin Maurizio Belpietro, në kuadër të eventit ”Il giorno della verita” theksoi problemet serioze me të cilat përballet Italia për sa i përket flukseve migratore duke theksuar se marrëveshja me Shqipërinë për migrantët ka shërbyer si frymëzim edhe për vendet e tjera, sipas faqes zyrtare të qeverisë italiane.

”Marrëveshjet me vendet e Afrikës së Veriut nuk janë të mundshme, janë të nevojshme dhe janë një nga çështjet kryesore që Italia ka sjellë në tryezën e Bashkimit Evropian. Jam munduar që qasja për çështjet e migracionit në BE të jetë një temë në bisedimet tona”, theksoi Meloni.

”Këtë po bën edhe Evropa sot, pavarësisht shigjetimeve të së majtës. Jo marrëveshjes me Tunizinë, jo marrëveshjes me Egjiptin, aq më pak me atë me Shqipërinë për të përpunuar kërkesat e azilkërkuesve në Shqipëri. Sepse nuk është e qartë se cili është propozimi i së majtës. Nuk e kam kuptuar ende se cilat janë zgjidhjet e tyre për këtë problematikë, thjesht na thonë se ne duhet që t’i anulojmë ato marrëveshje. Pra, le të heqim dorë nga pakti me Tunizinë, nuk duhet të flasim me Libinë. Sipas tyre ne jemi larg zbatimit të parimeve të shtetit ligjor me Shqipërinë”, theksoi Meloni.

”Le të themi se është bërë gjithçka që është e mundur për të ngadalësuar punën tonë, por ne vazhdojmë ta bëjmë atë punë dhe rezultatet vijnë ngadalë, apo jo? Jo me shpejtësinë që të gjithë shpresonim, por rezultatet po vijnë. Deri më sot, migrantët e paligjshëm në rrugën e Mesdheut Qendror janë ulur me më shumë se 60% krahasuar me të njëjtën periudhë të një viti më parë. Pra, pak nga pak kjo punë po jep fryte dhe është një rrugë e ndjekur tashmë në Bashkimin Evropian. Ndaj kam besim se edhe falë votës së qytetarëve, ne mund t’i themi përfundimisht Evropës se kjo është rruga që duhet ndjekur”, apeloi kryeministrja.

”Debati nuk është se si i rishpërndajmë, debati është se si t’i trajtojmë para se të largohen”, nënvizoi ajo.

”Të gjithë komisionerët dhe të gjithë liderët evropianë pyesin ‘a është marrëveshja me Shqipërinë jashtë shtetit të së drejtës?’, me shpresën se dikush do të thoshte se është jashtë shtetit të së drejtës. Nuk është jashtë shtetit të së drejtës, është krejtësisht e realizueshme dhe u them edhe këtë: nëse funksionon mund të jetë model dhe frymëzim edhe për disa vende të tjera që po na pyesin se si funksionon kjo”, shtoi Meloni.