Qyteti i Cyrihut thjeshtëson procedurën e natyralizimit

Udhëzimet për natyralizim në qytetin e Cyrihut nuk ishin ndryshuar që nga viti 1936 dhe nuk janë më në frymën e kohës

Personat që duan ta marrin shtetësinë zvicerane në qytetin e Cyrihut, tash e tutje do ta kenë më të lehtë një gjë të tillë. Këshilli i qytetit (qeveria) ka ngarkuar parlamentin e komunës që të shfuqizojë udhëzimet për natyralizim që nuk ishin ndryshuar që nga viti 1936.

Sipas këshillit në fjalë, e drejta federale dhe ajo kantonale janë të mjaftueshme për të garantuar një procedurë korrekte të natyralizimit, shkruan këshilli i qytetit në një komunikatë të publikuar të mërkurën.

Udhëzimet nga viti 1936 përmbanin norma “të vjetruara dhe të tepërta”, shkruan nzz.ch duke iu referuar ekzekutivit të qytetit të Cyrihut. Ndër këto norma bëjnë pjesë kërkesa e njohjes së dialektit dhe shpallja e kërkesave për natyralizim në gazetën zyrtare.

Veçanërisht jo në frymën e kohës së sotme të një mobiliteti të lartë, këshilli konsideron udhëzimet që kanë bëjnë me vendin e banimit. Ato kërkojnë jo vetëm 12 vjet qëndrimi në Zvicër, siç e kërkon e drejta nacionale dhe 2 vjet qëndrimi në një komunë të Kantonit të Cyrihut (që e kërkon kantoni) por edhe një qüendrim të pandërprerë gjashtëvjeçar në qytetin e Cyrihut.