Pushuesit presin nga dy orë para tunelit Gothard

Të premten e Pashkëve, automobilat, në pritje për të kaluar tunelin Gothard, kanë bërë një kolonë të gjatë rreth tetë kilometra

E premtja ka qenë dita e parë e Festës së Pashkëve dhe njëherësh dita e parë e pushimeve për shkollat në shumicën e kantoneve të Zvicrës. Në një ditë të tillë një numër i madh i zviceranëve ia mësyjnë drejt jugut, për pushime në Itali e tutje. Dhe gjithmonë tuneli i Gothardit në këto raste është ajo “vrima e gjilpërës” përmes të cilës detyrohen të kalojnë të gjithë ata që kanë marrë rrugën e jugut.

Kështu ishte edhe të premten e Pashkëve. Automobilat, në pritje për të kaluar tunelin, kanë bërë një kolonë të gjatë rreth tetë kilometra, raporton srf. Kjo i bie që udhëtarët me makina në autostradën A2, gjatë paradites dhe mesditës së të premtes kanë pritur mesatarisht nga një orë e gjysmë.

Madje edhe një ditë më parë, të enjten pasdite, udhëtarët kishin pritur më shumë se nga dy orë para tunelit. Vetëm në pasditen e vonë të të premtes ka filluar normalizimi i gjendjes.

Viasuisse u ka rekomanduar atyre që udhëtojnë në këtë drejtim, për t`i ikur tollovisë, të kalojnë përmes A13, nëpër San Bernardino.