Pse kjo kompani ajrore në Zvicër synon vetëm 65% të fluturimeve në kohë?

Pavarësisht sezonit veror, kjo kompani ajrore synon vetëm 65% të fluturimeve në kohë

Kompania ajrore kombëtare SWISS ka vendosur si objektiv që 65 për qind e fluturimeve të saj të nisen dhe të mbërrijnë në kohë gjatë sezonit veror, kur numri i udhëtarëve arrin kulmin, transmeton albinfo.ch.

Edhe pse kjo përqindje mund të duket modeste, kompania thekson se në llogaritje janë marrë parasysh faktorë të jashtëm që ndikojnë në operimet ajrore, si kushtet e motit, mbingarkesa e hapësirës ajrore dhe kufizimet që lidhen me situatën gjeopolitike.

Drejtori ekzekutiv i SWISS, Oliver Buchhofer, u shpreh se përgatitjet për sezonin veror kanë qenë intensive.

“Është gjithmonë një sfidë e madhe, por jemi përgatitur me kujdes dhe kemi besim se do t’i arrijmë objektivat tona”, tha ai.

Ndryshe nga SWISS, Hekurudhat Federale Zvicerane (SBB) synojnë që mbi 90 për qind e trenave të qarkullojnë sipas orarit, një standard dukshëm më i lartë, por në një sektor me sfida të ndryshme operative. /Albinfo.ch

---