Prindërve u kushton shtrenjtë rritja e fëmijëve

Fëmijët në Zvicër janë të dashur por edhe të kushtueshëm. Ndërmjet 690 dhe 1000 franga kushton mesatarisht rritja e një fëmije në muaj për një familje

Deri në moshën 18 vjeçare mund të kushtojë deri 180 mijë franga  pa e llogaritur kohën dhe nervat.

Përllogaritjet e shpenzimeve për ruajtjen e fëmijëve i ka bërë Enti Federal i Statistikave. Bëhet fjalë  vetëm për shpenzimet e konsumit por jo edhe shpenzimet e kohës. Kostot e përgjithshme për prindërit mund të shkojnë  deri 942 franga në muaj për fëmijë .

Për dy e më shumë fëmijë kostoja për fëmijë zvogëlohet. Për prindërit  me dy fëmijë shpenzimet mujore llogariten deri 754 franga ndërsa  me tre fëmijë në 607 franga. Shifrat janë të bazuara në të dhënat nga anketat lidhur me buxhetin familjar të realizuara nga 2009-2011.

Shpenzimet llogariten të jenë më të larta për prindërit e shkurorëzuar, gjegjësisht vetëmbajtës. Deri 1201 franga në muaj llogariten shpenzimet për një fëmijë të kësaj kategorie.

Fëmijët shkaktojnë më shumë shpenzime në moshë më të rritur. Nën 11 vjeç sipas Entit të Statistikave shpenzimet llogariten deri 691 franga në muaj  ndërsa  1005 franga për fëmijët më të vjetër .

Nëse një çift ka dy fëmijë, njëri prej të cilëve është më i ri se 11 vjeç atëherë shpenzimet shkojnë deri 597 franga zvicerane.