Policia e Kosovës: Në protestën në Mitrovicë të Veriut kanë marrë pjesë 1800 persona

Në Mitrovicë të Veriut sot është protestuar nga qytetarët serbë, të cilët kanë kundërshtuar rregulloren e re të Bankës Qendrore të Kosovës.

Policia e Kosovës ka njoftuar se në protestë kanë marrë pjesë rreth 1 mijë e 800 persona, transmeton albinfo.ch.

Sipas njoftimit, ashtu siç parashihet me ligjin mbi tubimet publike, protesta ka qenë e paralajmëruar nga organizatori, e që në këtë rast ka qenë shoqata e pensionistëve si dhe parimisht ishte marrë pëlqimi nga autoritetet komunale për shfrytëzimin e hapësirës publike.

“Policia e Kosovës çdo herë ka njohur dhe njeh të drejtën e qytetarëve për tubime publike, fjalën e lirë në tubime publike, protesta e manifestime në pajtim me Kushtetutën dhe ligjet në fuqi. Protesta në të cilën kanë marrë pjesë rreth 1.800 persona, përfshirë ata të cilët nga rajone të ndryshme kanë ardhur në formë të organizuar me autobus e vetura, ka përfunduar në ora 12:30 dhe ka kaluar e qetë pa ndonjë incident”, thuhet ndër të tjera në njoftim.