Policia e Kosovës, aksion në Leposaviq, dyshohet për një depo me mall të kontrabanduar

Policia e Kosovës mëngjesin e sotëm ka pranuar informatën lidhur me një depo në Leposaviq, ku po dyshohet për mall të kontrabanduar, përcjell albinfo.ch.

Lajmin për Gazetën Online Reporteri.net e ka konfirmuar zëvendësdrejtori i Policisë për veri, Veton Elshani.

I njëjti ka bërë të ditur se në depon e dyshuar tashmë ndodhet edhe dogana, të cilët po kontrollojnë mallin, pasi, siç tha ai, biznesi është i regjistruar.

“Sot në orët e paradites policia ka pranuar informacion në lidhje me dyshimin se në një magazinë (depo) në Leposaviq mund të ketë mall të kontrabanduar. Policia ka shkuar aty dhe së bashku edhe me krimet ekonomike dhe doganen janë duke e kryer punën e tyre. Biznesi është i regjistruar, por po shikohet për mall të kontrabanduar. Nuk ka të arrestuar”, tha Elshani.